|
#16
06-15-2008, 01:23 PM
| |||
| |||
| مذكرات زوج سعودي(26) رحلة ماليزيا جلست علي طرف السرير من الجهه الثانيه وحاطه راسها علي ركبها ماشوف الا شعرها...يألله يازين شعرها.....ونزل علي راسي سؤال كالصاعقه....هالحين وش أسوي....وش الدبره...فكرت أبرك عليها واخمها...خفت تهاوشني...قلت لها أجيب لك ماء رفعت راسها...عيونها محمره من الصياح...قالت أسمع أنا راسي مصدع ...وجيوبي ألأنفيه ملتهبه من العطر الي انت حاط ومن البشت ألي أنت لابس...بعدين وش ها العقال الي أنت لابس .....أنهارت معنوياتي ..كنت واقف وقعدت..حسيت كني دخلت الجنه شوي بعدين طلعوني الملائكه..قالو غلطان بالباب...حسيت كني بعد ما ركبت الطائره ألي بيروت نزلوني وقالو تذكرتك علي شروره...وطلعت في راسي أغنيه ما أعرف منها الا..إني أغرق..أغرق..أغرق..كنت الى صرت ادور علي شى ضايع بالبيت ارددها وامي تقول يا وليدي سم الله عليك لا تقول كذا...إنهيار كامل...ضعت ...وينك يومه... وينك يا فرج..وفجأه وبدون مقدمات وما أدري من وين ...أنفجر لساني بالكلام قلت أسمعي يابنت الحلال أنا ما عرف للحريم....وحكيت لها كل شى...من الثياب للحلاق والجزمه والبشت والعقال والقاروره الزرقاء..وكل الي قالي فرج...وحسيت إن ودي أصيح...قالت أجيب لك ماء؟ ألتفت عليها..لقيتها تبتسم لي ..يا أله الكون ..تبتسم لي ...ولأول مره عيونها تجي في عيوني...وحسيت كنها أرسلت من عيونها كهرب صقع في راسي ودخل علي قلبي وشرايني وتفرق علي كل أعضاء جسمي...كل أعضاء جسمي أنهبلت...صار فيه عرس وطقاقات وفرح وهيصه ..داخل جسمي...قلت إيه ألله يخليكي ...صبت كاس ماء وقالت لي سم...حسيت كن أذاني ودها ترقص.خاصة إن الطقاقات شغالين جوه ردح....أخذت الكاس وقلت بكل أدب ..سم الله عدوينك..ضحكت وقالت..أسمع فصخ ملابسك...(نزل قلبي لصباع رجلي الكبير ...أوف وصلنا للتفصيخ)..كملت ..ورح تروش وتدعك زين..وشف فيه صابونه أنا جايبتها..غسل فيها لا تستعمل حقت الفندق...سألت ببراءه...أفصخ هنا ........قالت....للللللللللللللللللا....ف صخ بالحمام وغير كل ملابسك وحط القديمه بالدولاب قلت ماعندي الا بيجامه ألبسها بدون سروال..ضحكت وقالت مالي شغل.... وخطر في بالي خاطر...أقول لها علي الحرق ولا أسكت.......................يتبع مذكرات زوج سعودي(27) رحلة ماليزيا دخلت الحمام...الله يازين الحمام كل شى يلمع وجخ... والعجيب إن مافيه ريحه تفصخت ودخلت تحت الدش...وقعدت أتدعك وأغني إني أسبح..أسبح..أسبح...ياألله البنت هذي أخذت عقلي...وتذكرت فرج وكلمته..الله ..الله بالثقاله...العود علي أول ركزه..ولا تعطيها وجه...يا فرج أنا عطيتها كل شي.....الوجه.. والقفى ..وألي فوق ..وألي تحت وإذا (بتز..) علي راسي أنا بصلحه لها...من زين راسي عاد يافرج...إلا أبرك لراسي...لو (ز..) عليه...أكيد هذا هو الحب ألي يقولون عليه...جاء الصابون علي المناطق الحساسه..وولعت....الله يلعن أبو ألحرق..كانه بينكد علي الليله...قلت يا ولد أحسن شى قولها عن الأباطي..إن مشى ألحال ..علمها بلي تحت وإن حسيت بشى ولا اش....إسكت وتحمل..لبست ألبيجامه بدون سروال..وطلعت...قلت ..ها وش رأيك؟...قالت تعال..أقرب...قربت...وقربت هي وجهها تشم...وأنا أنتظر وش تقول...قالت باقي فيه ريحه..بس أشوي من أول....قلت يعني ناجح بتقدير مقبول...ضحكت وقالت ..لا أقل شوي...الله لايبارك بك يا فرج لا أنت ولا قارورتك الزرقاء...قلت وش رأيك تبخين علي من العطر حقك...قالت بس هذا نسائي..قلت أيه مايخالف..المهم أنها ريحه زينه...جابت شنطتها...وطلعت قاروره جخ وبخت علي...حسيت يوم فاحت الريحه إني أرتفعت عن ألأرض..يا ناس يا انا كنت في قحط وجفاف...قلت ها وهالحين...قربت راسها شوي وقالت ..ها لحين زين...قلت أبي أقول شى بس مستحي..أسترخت علي السرير ...والظاهر..الظاهر.. والله أعلم إنها كانت تتوقع كلام ثاني..قالت بدلع واضح حتي للدلخ مثلي....لا قول ألي تبي لا تستحي..قلت....عندي حرق بأباطي.............................يتبع مذكرات زوج سعودي(28) رحلة ماليزيا حسيت أنها تضايقت...قلت يا بنت الحلال...أنا إنسان من الشغل للبيت ما عندي خوات ومالي أصحاب إلا فرج وما عرف شى وهذا ألي الله قدرني عليه ...قال لي فرج حط تحت أباطك من عطره حطيت..وبيني وبين نفسي قلت لوتدرين بعد وش انا مسوي تحت..سكتت شوي...بعدين قالت...شف هذا فرج ما عاد أبيك تحتك فيه..(طار صديق العمر) ..ولا أبي أسمع أسمه..خلك دايم مع أخواني ..قلت حاضر ..قالت تعال ورني وش فيك...فكيت أزارير قميص البيجامه وطلعت لها القفص الصدري (شى يحوم الكبد) لكنها تحملت بنت الحلال ..ورفعت يدي فوق...قالت ..اوف اوف يامسكييييييييييين..هذا منزلط..فصخ..فصخ...(انا الليله عندي حساسيه لهذي الكلمه ياليتها تحدد وش افصخ)...قلت وش أفصخ...ضحكت وقالت فصخ القميص...وطالعت بأحلي عيون وقالت.... وبس ..فصخت القميص..وأضفت لعاهة القفص الصدري...الكتوف واليدين...فتحت شنطتها وطلعت كريم..وفغصته وحطت علي أصبعها..وقربت مني...تقريبا ..تقريبا لاصقه ...إلا شوي...مابقي في كل جسمي نقطة دم .. كل ألدم راح هناك تحت..وصار راسها عند..خشمي..دخلت خشمي بشعرها..وأخذت..شفطتين ..شهيق...بدون زفير..اي زفير... وألله ما أطلع هذي الريحه لو أيش..كتمت نفسي ألين تأكدت إن الريحه أستقرت في المخيخ...الظاهر إني طلعت صوت في عملية الشهيق..لأنها تراجعت للخلف براسها مع أبتسامه..ونظره..سريعه لعيوني بعدين رجعت راسها وها المره لصقته بصدري...أنهبل قلبي وبدأ يطربق..أنا شخصيا ما أعتقد أنه نبض...ومتأكد إن ألي بالشارع سمعوه...دخلت خشمي مره ثانيه ...كنت في قمة السعاده...هي تلط باطي بالكريم...وانا أشمشم شعرها...قالت..ماودك أحط بالثاني...دورت علي حبالي الصوتيه أبي أرد ..ما في.. راح الصوت ...وحسيت ريقي صار ناشف...هزيت راسي وبدون ما أتكلم...رفعت إيدي ألثانيه...وأثناء أنتقالها من باط ألي باط...حدث الأحتكاك العظيم ..هي بالعاني أو لا ..الله وحده يعلم...كل ألي أعرفه..أنه حصل.. لجزء..صغينون من الثانيه...وشبت نيران جهنم في جسمي...حاولت أركد..افكر..مافيه دم بمخي ..كل الدم راح هناك...حست هي بحالتي...رفعت راسها عن صدري وصار وجهها في وجهي....ماقدرت أتحمل أكثر...هجمت...........يابابا...يابابا... .ول ما مدنا تونا ما سوينا شى...وإذا بنتي ليلي فوق راسي ...بابا عطنا قروش نبي نروح للمول....قالت بعلتنا مشاء الله عليك نمت...قلت لا والله أهوجس...قالت ..خير ..قلت لها كنت في فندق انتركونتنتال..وأنتي تلطين باطي كريم...وين العيال قالت الكبار نزلو...قلت عطى ليلي ومشعل قروش كثيره وخليهم يطسون للمول...والحقيني علي غرفة النوم ...قالت وش فيك مدهر من طبينا ماليزيا...قلت والله ما دري يمكن الهواء...........................يتبع مذكرات زوج سعودي(29) رحلة ماليزيا طلعت البزران والشغاله وجت تركض لغرفة النوم..قالت ......تصدق يا أبو فهد حتي أنا مادري وش بي....قلت بنفسي دامها مستانسه وفي حاله رومانسيه..ابي أستغل الوضع....قلت...وش رايك ها لحين دام ما فيه الا أنا وانتي بالشقه تحطين لنا شريط غير عذاب القبر شريط يوسع الصدر...ويرجعنا لفندق انتركونتنتال....قالت من عيوني...دخلت الحمام وصلحت الي قدرها الله عليه...بعدين راحت لشنطتها السحريه وأخرجت شريط وحطته في المسجل...وجائت تتراقص...أستبشرت خيرا أنسدحت جنبي قلت وش حطيتي قالت حطيت شريط الطريق للجنه...وفي الحقيقه شريط الطريق للجنه هو قمة الرومانسيه عندنا وما ينحط إلا في أجواء خاصه والمطوع ألي بالشريط الظاهر أنه محاسب..لأنه يستعمل لغة الأرقام ليثبت لنا أن الطريق للجنه سهل جدا مثلا..يقول بصوت حنون ورومانسي..هل تعلم إن ألأبتسامه في وجه أخيك صدقه...فلو أبتسمت في وجه عشر أشخاص في اليوم...هذه عشر صدقات والحسنه بعشرة امثالها...صارت مائه...بعدين يحسب بالشهر...وبالسنه...وهو الله يجزاه خير...يحسب كل شي...إفشاء السلام..إزالة ألأذى عن الطريق...وبعدين يروح للأرقام الكبيره...أبو ثمانين ألف...فما فوق....طيب يمكن أحد يسأل وين الرومانسيه؟؟ أنا أقول لكم ...المطوع يقول إن ألي حنا قاعدين نسويه.. فيه أجر وبعدين يبدأ يحسب كم مره بالأسبوع وبالشهر وبالسنه..يعني حنا شغالين ها لحين والعداده بتحسب ....أنا قلت لحرمنا المصون أنا أبي أدخل الجنه بهذي الطريقه...ومعها طريقة ألأبتسامه...بس في وجه أختك المسلمه ألزينه....زعلت علي..ما دري ليش.....سألتني..حرمنا وأنا أقوم بعملي بكل أمانه وإخلاص...إلا وش جاب طاري فندق إنتركونتنتال....قلت شفت الكيوي ...تذكرت...ضحكت وقالت الله يفشلك فيه أحد ما يعرف الكيوي...ضاعفت العمل بأمانه وأخلاص لأن المعامله...علي وشك تخلص ما بقي الا التوقيع......................يا ألله ياألله وقعت.................................... ..يتبع مذكرات زوج سعودي(30) رحلة ماليزيا قامت بعلتنا بعد توقيع المعامله بسؤالنا السؤال التقليدي المعتاد بعد إنجاز أي معامله....أجيب لك فاكهه قلت لا عجلي تروشي حتي نطلع....دخلت الحمام...وأضفت أنا الحسنات ألي ربحتها ألي رصيدي...بعد أن أشعلت سيجارة النصر العظيم....قالت بعلتنا بعد خروجها...شف لنا مكان هادي وقريب يلعبون فيه العيال كوره وحنا نقعد نتقهوي ونسولف....قلت من عيوني...قالت تسلم عيونك.. وفاجأتني للمره الثانيه خلال خمسه أيام بالجمله الغزليه الي ما أسمعها الا كل سنتين مره قالت...أنت حليل بس لو الله يفكك من بعض ألأشياء.... أكيد هواء ماليزيا فيه شي ويمكن كومة العرسان الي يقضون شهر العسل حركت المشاعر الراكده ...الله أعلم...سألت موظف عن حديقه قريبه بمواصفات بعلتنا الكريمه...أعطاني العنوان وقال هذي أقرب شي...جلست أمنا تجمع عفش الطلعه...ورحت أنا أجمع القطيع...أخذنا تاكسيين ولاحظت إستغراب سائق التاكسي من العنوان وصلنا وفهمت سبب الأستغراب..لأن الحديقه شعبيه ووسط حي سكني..والظاهر حنا أول سعوديين يطبونها....تحركت الغريزه ألأمنيه عند أمنا..وقالت مهوب خطر علينا..قلت ليه...قالت شف ما فيه سعوديين ولا أجانب وشف كلهم يناظروننا...قلت يا بنت الحلال وكلي الله ما فيه الا العافيه وهم يناظرون عشان لبسك غريب عليهم وكومة البزران الي معنا قالت قل ما شاالله... قلت ماشاالله..دخلنا..الحديقه زوينه فيها بحيره صغيره ومكان لتأجير القوارب الصغيره وملاعب كوره وألعاب للأطفال...قالو عيالي نبي نستأجر قوارب..رفضت أمهم بشكل قاطع..حاولت أقناعها أنه ما في مشكله حتي لو أنقلب ألقارب عيالي كلهم يسبحون...قالت عيالك يسبحون بالمسبح بهذا لا...إذا فيه أحد يسوق فيهم معليه أنت لأ....قلت بكيفكم أنا أبي أستأجر...لقيت عندهم نوعين ..نوع يشيل أثنين ونوع صغير ونحيف يشيل واحد يسمونه (كنو) عجبني ألصغير...قلت أبي ذا...قالت أمنا بعصبيه عطني محفظتك وإذا معك أوراق هاتها...عطيتها..مسك لي الرجال القارب وفيه فتحه علي شكل دائره دخلت فيها رجليني وبعدين قعدت ..ناولني المجاديف وهو ماسك القارب ..أخذت المجاديف وفك هو القارب...ثواني وأنا تحت الماء ورجليني ناشبه والقارب فوقي...إني أغرق..أغرق..أغرق...طبو العمال وطلعو رجليني...وطلعت .. موية البحيره وسخه ولها ريحه وأنا بكامل أناقتي بنطلون وقميص وجزمه...وتوجهت للمكان ألي قاعدين فيه عيالي...والمكان مليان بزارين ماليزيين وأهاليهم والجميع يضحك علي....وصلت لعيالي وهم يضحكون وأمهم مولعه........................يتبع مذكرات زوج سعودي(31) رحلة ماليزيا قلت لها عطيني منشفه..ما ردت...واضح إن الهوشه جايه...وأنا صاحب خبره طويله في الهواش...وقد طورت تكتيك حربي معين أستخدمه في المعارك الزوجيه...ويشمل الكر والفر ...الهجوم المباغت... الهجوم المضاد...ألأنسحاب المنظم ... والأستسلام المشروط .. بألأضافه للعديد من الخطط الدفاعيه...وقد طورت شبكه إستخباراتيه من عيالي تعتمد أساسا علي الرشوه بالأضافه للعديد من المغريات والهدايا..وقد وجدت انه من ألأنسب لي ان تكون الحديقه هي أرض المعركه وأن أبدأ أنا ألهجوم (تكتيك الضربه الأستباقيه).. أطلقت أول رصاصه قلت..هالحين كل الي مزعلك إني طحت في المويه...ماردت...أحتاج صاروخ صغير..قلت عجيب أمرك ممنوع يعني إن الواحد يحاول يستانس والا هو حرام وأنا ما أدري....ما ردت...ووجدت أنه بناء علي معطيات المعركه لابد من أستخدام ألقنبله العنقوديه...قلت ..عجيب أمركم يالحريم وبالأخص أنتم يالسعوديات...أعوذ بالله ناشبين بحلق الواحد ما يقدر يسوي شي....ألتفتت علي وبدأ ألأشتباك قالت...أنت هالحين ما تشوف شكلك وريحتك..أنت جايبنا هنا عشان تشقينا ولا عشان توسع صدورنا.... من جينا وحنا في غثاك....مالك كم يوم بغي ينكسر ظهرك..وفشلتنا قدام ألي يسوي والي ما يسوي...قلت ..تدرين وش مشكلتكم انتم يالسعوديات؟ قاطعتني بهجوم مباغت وسريع...قالت...مشكلتنا ...مشكلتنا إن ألله بلانا فيكم...قلت لا والله مشكلتكم الخوف...الخوف من كل شى تخافون من كلام الناس ...تخافون من الحرام ..تخافون إنكم تجربون شى جديد أو تروحون لمكان جديد...خوف..خوف...... ذابحكم الخوف والا أنا وش سويت ...جربت أتزلج وطحت..وضحكو ألناس ..طيب خير يا طير..وش صار...ما فيه مشكله أطيح مره ثانيه وثالثه وبعدين أتعلم وماعاد يضحكون علي...لكن لا ..وش يقولون عنا الناس...أبونا طاح...وخزياه..الله يحرقهم أنا وش علي منهم...وبعدين أبي أقولك شى..لو ألامريكي ألي أخترع الطياره قالت له حرمته...والله إن طرت بها الحديده الي انت مسوي إني لاهج وخليك أنت وعيالك..تتوقعي نكون ها لحين في ماليزيا... والى سوي أللمبه لولا إن حرمته تودي له كل يوم دلة القهوه والتمر..للورشه وهو ماغير يربط بها السلوك وهي تحوفه كل ما طلب شى قالت سم ... ما كان قدر يسوي اللمبه... وكان نصير الي ها لحين قاعدين بالظلما....سكتت...قلت وين دخاني بس عطيني سيجاره...مافيه فايده..................يتبع
__________________  XX +3: 07:48 AM. 05-10-2008 عُدلت بواسطة بو فهد; 06-16-2008 الساعة 12:18 PM.  |
|
#17
06-16-2008, 12:17 PM
| |||
| |||
| مذكرات زوج سعودي(32) رحلة ماليزيا تعدلت حرمنا المصون في جلستها... وقالت..شف فلسفتك ذي ماهيب نافعتك...ولا تقول إمريكان ما إمريكان...أنتم وين ولأمريكان وين ...هذولا ناس عندهم عقول ماهم مثلك ما تدري وين الله حاطك...وألأمريكان ماهم ملاقيف....مثل بعض الناس (يعني أنا) كل ماشافو شى دردبو روسهم....يابن الحلال أعقل واركد...أنت معك بزارين بذمتك....حسيت إني بدأت أخسر ألمعركه ولابد من ألأنسحاب بأقل ألخسائر....قلت شوفي يا بنت الحلال هذي كلها وجهات نظر..أنتي لك رأي وأنا لي رأي ومهوب لازم نتفق...قالت لا مهوب علي كيفك..(واضح المطلوب إستسلام كامل)..لازم تركد وتخلي عنك الهبال....وكان عندي خيارين ألأستسلام أو مواصلة المعركه وتغير التكتيك.....قررت إني أخذ هدنه صغيره أراجع فيها سير المعركه...وسبب فشل الهجوم ألأول...قررت بعد تفكير سريع مواصلة المعركه وإستخدام تكتيك ألحرب النفسيه ....قمت فصخت البنطلون والقميص والفنيله..وصرت بالسروال الداخلي وهو أمر لا تحبه أطلاقا ..قالت وش فيك؟..قلت أبي أعصرهم وأنشفهم...قالت وتقعد كذا بين الله وخلقه ...قلت وأنا أتصنع ألحماشه والقوه...ما علي منهم...ناولتني منشفه وقالت...خذ أستر روحك....قلت وأنا أعصر بنطلوني ...ما فيه داعي خلي الماليزيين يتفرجون علي السعودي المهبول...ألي طاح بالماء وتفصخ وقعد يعصر ثيابه...أخذت القميص وبدأت تعصره..(تحول في إتجاه المعركه وبوادر نصر)...قالت بصوت ناعم..هالحين وش أنت قايل....قلت بدون ما أطالع فيها..(تكتيك هجومي) ... وش أنا قايل... قالت ما قلت نخلي الهواش للسعوديه...قلت ومن بدأ الهواش أنا ولا أنتي...قالت أنت الي جبت طاري ألأمريكان وانت تعرف إني أكرهم...خفت نبدأ هوشه جديده...وهي دايم تحصل بعد كل هوشه...وأسميها أنا ..(هوشة من بدأ الهواش) وبعض الأحيان تكون أشد وأعنف من الهوشه ألأساسيه لأننا نرجع لتاريخ الهوشات السابقه....قلت هاتي المنشفه..أخذتها ولفيتها حول.كرشنا العامره..وفصخت السروال وناولتها إياه وقلت أعصريه صرخت.. وتقعد كذا بلاسروال ...قلت ليه تحتاجين المنشفه وسويت حركه كني ابي أفصخها ...صرخت...لا ..لا ..خلها ..خلها أعوذ بالله من ذا الرجال....قلت صبي لي شاهي.................يتبع
__________________ XX +3: 07:48 AM. 05-10-2008 |
|
#19
06-21-2008, 12:56 AM
| |||
| |||
| مذكرات زوج سعودي(33) رحلة ماليزيا شربت الشاهي مع السيجار ه وقررنا العوده ...جمعنا القطيع قبل غياب الشمس..وأصدرت أمنا التعليمات لي وللشغاله وش إنشيل ووش نخلي وقمنا بعملنا علي أكمل وجه ولله الحمد والمنه...وتقدمت أمنا القطيع في إتجاه البوابه الخارجيه يتبعها ألأولاد والبنات وهم يلعبون بالكوره...وهي تزعق عليهم يوقفون اللعب ويعجلون عشان تلحق صلاة المغرب بالفندق ونتبعهم أنا والشغاله محملين شناط وأكياس....خرجنا إلي الشارع وهو شارع فرعي صغير...وانتظرنا وانتظرنا...مافيه تكاسي تمر قالت بعلتنا...أنا خابره ألأمريكان ...إذا أخذو بزارينهم إلي مكان..يخططون ويسألون..إذا فيه تكاسي ولا مافيه... مهوب يدردبون روسهم وبس...لم أرد...مهوب لأن موقفي ضعيف مثل ما قد يفكر بعض ضعاف النفوس ...لكن لأن جوالها دق...وعرفت من الكلام ان المتصله اختها....وبعد السلام والسؤال عن فلان وفلانه وبزارينهم وبناتهم...سمعت حرمنا المصون تقول...لا..ماشاء الله..متي أكيد.....والله مره روعه..الجو حلو وأمان...وأبو فهد (أنا) مهوب مخلي علينا قاصر....بعد الجمله ألأخيره عرفت إن فيه مصيبه جايه خاصة عندما أنهت أمنا المكالمه وهي تقول..لا إن شاء الله أبوفهد ما يقصر وبيرتب لكم كل شى....والتفتت بعلتنا علي ألأولاد..وهي تحاول تصنع الفرح...ياعيال ..وش أبشركم خالتكم أم سليمان وعيالها يبون يجون ماليزيا...واستقبلنا جميعا الخبر بكل برود .. عيالي لأنهم يكرهون عيالها فهم أبالسه...يضربون ويعضون...وياويل أحد يهاوشهم فالخاله العزيزه تعصب وتزعل ...أما أنا فما أطيق زوجها بعيشة الله وأسميه عبدالرحمن ماشا الله...لأنه لا يذكر أسمه إلا بعده ماشا الله (حتي إني في البدايه أحسب أبوه أسمه ماشا الله) السبب أنه ما يفوته فرض بالمسجد ويقوم عياله يصلون الفجر بالمسجد...وأبو سليمان نقيضي تماما..لا يلعب بلوت ولا أي لعبه أخري... ما يحب الكوره...ولا عنده سواليف من أي نوع سوي أخر أسعار الخضروات والرز وخلافه....بالمختصر الرجل غثيث وبالأضافه إلي كل ماذكر فهو بخيل جدا (سنع بتعريف زوجتي)..وهو طويل ألقامه (قاهرني) لكنه عصقول ما فيه أي مرتفعات لا من قدام ولا من ورا واقول بكل ثقه إنه أدلخ مني بكثير وأم عياله لا عبه في حسبته لعب ..علي ألأقل أنا أناوش علي طريقة حرب العصابات أما هو فلا يهش ولا ينش...قلت لبعلتي بكل نفاق ..بشري عساهم بيطولون عندنا... قالت لا.. بس عشره أيام...طبعا أنا متأكد إن أبو سليمان وأم سليمان لم يناقشو إذا كان حنا ودنا يجون عندنا والا لا لأن هذي ماهيب مشكلتهم هذي مشكلتنا حنا.....وصل تاكسي وركبت البنات وأمهم ...وقلت لاحد يسأله بكم إلا عند الفندق.....................يتبع مذكرات زوج سعودي(34) رحلة ماليزيا غادرو البنات وأمهم إلي الفندق وبقيت أنا وألأولاد في إنتظار تاكسي....وقررنا المشي في إتجاه الطريق العام....وتم ألأتفاق مع أولادي ( وبرغبتهم طبعا )...إنهم يقنعون أمهم تسكن خالتهم بعيد عن فندقنا...كما تم توزيع المهام عليهم...بحيث إن فهد هو المسؤول عن ضرب عيالها في حالة أي إعتداء غاشم علي أخوانه أو خواته كما تم تكليف مشعل...بأنه هو ألي يقول لعيالها يروحون يجيبون فلوس من أبوهم في حال دخولهم ملاهي أو مطاعم مع بعض...كما تم تعميد الجميع بعدم الترجمه لأبوهم....كما تم إستنفار جميع ..الوحدات العامله في ألأستخبارات لجمع المعلومات وتقديم التقارير أولا بأول....أخيرا وصل تاكسى ورجعنا للفندق ...في الطريق تم ألأتفاق علي أننا نقول للأم إني رحت للأستقبال ولا يوجد شقق فاضيه في فندقنا ارتحت لهذه التدابير وشعرت بالفخر ولأعتزاز بقدرات قواتي المسلحه...وصلنا للشقه واستقبلتنا رائحه ألأكل وكنا ميتين من الجوع..قالت بعلتنا أدخل تروش وبدل وأنا أجهز ألأكل...دخلت تروشت...وخرجت وإذا بولدي فهد..نائب القائد العام ورئيس شعبة ألأستخبارات في وجهي قال بصوت منخفض ترا ماما حجزت لخالتي في فندقنا شقه..قلت أوف كيف عرفت...قال يمكن ساعدتها مي...(خيانه إختراق أمني خطير ) قلت رح نادها بدون ماتحس أمك...جائت مي...قلت لها ليش يابنتي تحجزين لخالتك في فندقنا...قالت يابابا والله حاولت أصرف ماما بس المغربي المترجم هو الي ساعدها..(حمدت الله علي تماسك الجبهه الداخليه) .قلت طيب نحتاج إجتماع عاجل علي مستوى القمه ما في داعي ليلي تحضر (ليلي الحلقه ألأضعف ومشكوك في ولائها)...أصدرت أوامري لفهد للتحضير للأجتماع....دخلت الصاله وقلت لبعلتنا بكل حب...أبشرك لقيت شقه لأبو سليمان في فندقنا...قالت الله يجزاك خير...بس ما قال لك المغربي أننا حاجزين ...قلت ما شاالله حجزتي ..لا ما شفته بس ماهي مشكله نلغي واحد منهم .. قلت ..الحمد لله اننا لقينالهم في فندقنا عشان نستانس مع بعض.....نظرت بعلتنا لي نظره خاصه ترجمتها........يا كذب الررررررررررررجال................يتبع... مذكرات زوج سعودي(35) رحلة ماليزيا قررنا بعد مشوارات مكوكيه أن يعقد ألأجتماع في (كى إل سى سى) وهو مول كبير بجوار ال (توين تاور) وكان أكثر المتحمسين مي لأنه بإمكانها أن تقوم بغزوه مباركه للتسوق في المول بعد المداولات وتم إختيار التوقيت في تمام الساعه السادسه بتوقيت ماليزيا وسبب إختيار هذا التوقيت إنه قبل أذان المغرب بقليل ...وهذا يضمن عدم مرافقة بعلتنا لأنه حسب تعبيرها ..طايل قاصر وهي لا تريد ان تكون في التاكسي وقت صلاة المغرب كما إنها تكره هذا المول لأن كله موسيقي وردح وناس موسعه صدرها وهذا يتناقض مع قيم أمنا كما تم تكليف مشعل بضمان تواجد ليلي بالملاهي حتي لا نبلش فيها....هذا وقد سارت ألأمور كما خطط لها وفي الساعه المحدده توجهنا ألي كى إل سى سى.....وتم إختيار طاولة ألأجتماع..في مقهي خارج المول....عشان أقدر أدخن علي كيفي...جلست أنا (القائد ألأعلي) في صدر الطاوله وعن يميني جلس ولي العهد نائب القائد ألأعلي ورئيس ألأستخبارات العامه فهد..وهو ساعدي ألأيمن ورجل المهمات الصعبه...مخلص وكتوم وعنده صلاحيات بالسحب من الميزانيه (محفظتي) دون ألرجوع لي...وعن يمينه يجلس خالد..نصاب محترف...سهل إختراقه من قبل ألأعداء...يلعب علي الحبلين أحيانا...حسب مصالحه الشخصيه لذلك عليه رقابه شديده ...من قبل رئيس ألأستخبارات شخصيا...يليه مشعل أصغر ألأولاد.... وتحت سيطرة رئيس ألأستخبارات وقد عينه فهد رئيسا لشعبة المعلومات...لأن أذانه كبار...ولقدرته علي اللعب بجهاز ال إم بي4 وتسجيل كل ما يدور حوله من أحداث وكلام....وعلي يساري جلست مي ..منافقه من طراز رفيع.. وأستطيع تحديدالمبلغ الي تبيه من أسلوبها فإذا قالت كيف حالك يابابا 10 الي 20 ريال ..حبه بقرف علي خدي ..أقل من 100ريال حبه علي الراس أقل من 500 ريال أما إذا حبت خدي وراسي وقبلت يدي بخشوع فالمبلغ بالألاف وهي عميله مزدوجه نستغلها أحيانا لتمرير معلومات خاطئه لتضليل ألأعداء...وعلي يسارها تجلس جود ذكيه قليلة الكلام ومخلصه لي ويعتمد عليها في نقل ألأخبار من قسم الحريم في حال طرد مشعل لأي سبب...هذا وقد بدأ ألأجتماع بالنشيد الوطني..بالروح ..بالدم ..نفديك يا بابا..............................يتبع
__________________ XX +3: 07:48 AM. 05-10-2008 |
|
#21
06-21-2008, 02:44 AM
| |||||
| |||||
| اقتباس:
 مهوووي اقتباس:
انا للحين اضحك على شريط الطريق إلى الجنة اقتباس:
__________________ XX +3: 07:48 AM. 05-10-2008 |
|
#22
06-22-2008, 04:35 AM
| |||
| |||
| مذكرات زوج سعودي(36) رحلة ماليزيا بدأ ألأجتماع بأي من الذكر الحكيم رتلتها علينا المقرئه الشيخه جود...وقرأت "قل هو الله أحد" ثم ألقيت عليهم خطاب ألأفتتاح..ذكرتهم فيه بضرورة الوقوف صفا واحدا ضد أعدائنا وكان من أبرز النقاط التي تضمنتها كلمتي الساميه..تذكير مي وجود...بضرورة المقاومه الشرسه لموضوع الغطاء وعدم ألأستسلام أو التنازل عن ثوابتنا..علقت مي...إف يابابا..يعني إحنا عايشين في نكد وطفش هناك يجون ورانا إلي هنا....والله ماني متغطيه لو إيش...قلت ممتازه يامي....قالت جود أنا أقول مافي داعي نزعل ماما لأنها راح تنكد علينا إذا زعلت... أحسن شى نتفاوض معاها أنه إذا جاء العله (أبو سليمان) نتسفع....وفي ألأماكن الثانيه نكشف ..غطا بالكامل..لأ..قلت... لا يا جود في المفاوضات لازم تطلبي دايم أعلي شى بعدين تفاوضين علي التنازل شوي شوي...خليكي ساكته ..وخلي مي تفاوض ماما ... وإذا شفتي المسأله تأزمت مره...تدخلي وإقترحي الي قلتي...قالت حاضر يابابا....قلت أسمعو أهم شى إنهم ما يستانسون.. لأنهم إذا أستانسو بينشبون بحلقنا كل صيفيه..وأهم شى نعرف نقاط ضعفهم...مثلا ألأريل (لقب من ألألقاب الي أعطيتها لأبو سليمان) ما يعرف إنجليزي ...ما أحد يساعده ويتلقف ويترجم له وإذا واحد فيكم ورط معاه يدعي انه ماهوب فاهم....بعدين ما تفضحوني قدامه...ترا أنا عنده بلبل بالأنجليزي..لا تضحكون علي أبد قدامه...قلت وش عندهم نقاط ضعف أو مشاكل تذكرو....أي شى عن خالتكم...عيالهم..ألشحط (لقب اخر لأبوسليمان)..قال خالد...سليمان يعصب مره وينقهر إذا هزمته في البلاي ستيشن...ودايم خالتي تضغط علي عشان أخليه يفوز...قال مشعل ..حتي بدر يقعد يصيح إذا فزت عليه...قلت ممتاز...ممتاز....ممنوع يفوزون منعا باتا...التفت إلي ولي العهد فوجدته مدخل نصف أصبعه في خشمه وهو يتأمل ألطفايه ومستغرق في تفكير عميق...وحسيت أنه راح يطلع علينا بفكره جهنميه...لأنه فهد..معروف إذا دخل أصبعه في خشمه ماعنده لعب (طبعا ذاك العجل من هذا الثور)...قالت جود..بابا خالتي دايم تقول عن أبوهم إن بطنه حساسه...وإنه دايم يحرجهم في المطاعم...إذا أكل حاجه فيها فلفل ولو شوي....قلت وش يصير له...قالت بطنه يمشي....قمت من مكاني وقبلت جود علي راسها....وقلت يا سلام عليكي ياجود.....................يتبع
__________________ XX +3: 07:48 AM. 05-10-2008 |
|
#23
06-23-2008, 12:48 PM
| |||
| |||
| مذكرات زوج سعودي(37) رحلة ماليزيا زاد فهد عمليات التنقيب في خشمه وبدأ بتحريك رأسه وأرجاعها للخلف وألي الجوانب ..أخيرا أخرج ولي العهد أصبعه من خشمه ووضعه أمام عينيه وقال وهو يتأمله...بابا وش رأيك إذا جاء أبو سليمان تودينا الحديقه الي لعبنا فيها كوره ...وخلنا نلعب مباراه هو حارسهم وانت حارسنا ومالك إلا الي يسدحه لك بالملعب بشوته قويه في بطنه..... قلت لا يا ولدي بطنه خله علي وانا ابوك... أنا أبيك تصيده في مكان ثاني...قال وين يعني...دنقت علي أذنه وقلت.... في العده يابابا....قال ولي العهد نائب القائد ألأعلي ورئيس ألأستخبارات العامه..تم يابابا...قالت جود... هم متي بيجون يابابا... قلت بكره الساعه 12 الظهر...أنتهى ألأجتماع وتم توزيع المهام علي المجموعه...وكان من أهم النقاط أنه مايطلع صحن من شقتنا الي شقتهم إلا وفيه فلفل حتى لو هو حلا....ممنوع يفوز أي واحد من عيالهم بأي لعبه..حتي عبودي الصغير...وفي حالة الفوز يتم عمل حركات عشان ينقهرون ويصيحون...في حال طلبت الخاله من أحد يشيل أكياس يتم ترك ونسيان كيس واحد علي ألأقل في كل مره...كما تم تعديل الفقره الخاصه بالي يضربهم في حال اي إعتداء .. وخاصة علي ليلي.. بحيث يتم التناوب في جلدهم بين فهد وخالد.. وتم التصريح لمشعل بألأستمتاع بجلد عبودي بين الحين وألأخر.... هذا وقد أختتم ألأجتماع بدعاء جماعي ودعينا الدعاء الي فيه زلزل ألأرض تحت أقدامهم وشتتهم بددا ومددا...جود حافظته الله يجزاها خير....ثم قامت مي بتقبيل رأسي ويدي بخشوع وقالت....أهم شى انت يابابا لا تزعل نفسك....قلت ..كم..قالت..1000 بس......................يتبع مذكرات زوج سعودي(38) رحلة ماليزيا ذهبت مي وخالد ألي المول وأشار ولي العهد الي مشعل بمرافقتهم (إحتياطات أمنيه) وبقيت أنا وفهد وجود في المقهي قالت جود ..هالحين يابابا ليش حنا السعودين معقدين من بد خلق الله...شف الماليزين مثلنا مسلمين وبناتهم وحريمهم يروحون ويجون ويشتغلون...طيب ها لحين كل ذولا بيروحون للنار....أعتدلت في جلستي وقلت....شوفي يابنتي....حنا ما حنا معقدين..حنا مساكين...كنا نايمين والحياة عندنا بطيئه جدا..تمشي علي شوي شوي وكنا مبسوطين ألي يصيد سمك والي يزرع والي يرعي أحيانا ياكلون وأحيانا مايلقون أكل يصلون ويصومون ويزكون والعالم فيهم يالله حافظ جزء عمي...ما عندهم عقد.. بيوتهم مثل بعض... لبسهم مثل بعض... وعيشتهم مثل بعض.... وكانو عايشين في حريه...حريه من نوع خاص لكنها حريتهم مايبون غيرها...وكل بلد عايشين بطريقتهم أهل الشمال لهم طريقتهم وبالمثل أهل الجنوب وأهل ألغرب وأهل ألشرق وأهل الوسط .....وكلن راضي بطريقته وما أحد يحاول يفرض علي الثاني طريقته ولا عاداته ولا لبسه..ولا مذهبه...وفجأه وبدون مقدمات ولا أستعداد طلع علينا البترول وبدل ما يساعدنا عفسنا عفسه قويه....والله نكبنا البترول ياجود.....عارفه وش سوي فينا البترول ياجود...تخيلي طفل عمره سنه.. من الي توهم يبدون يتعلمون المشي... يمشي ويطيح...يجون ويصكونه بإبرة هرمون...ماتدرين إلا وهو خلال أيام صار كبر أبو عشرين سنه وبعدين قالو له يالله أركض...طيب هو من جوه أبو سنه... وتجربته صفر...وعقله صفرين....كيف يركض....هذا هو ألي لخبطنا...البترول قال فهد بس يابابا لولا البترول ماكان صار عندنا مدارس وجامعات ومستشفيات و..قاطعته وقلت ديكور ياولدي كلها ديكور.. الي تشوفه 99% منه ديكور....قالت جود ها لحين وش دخل البترول يابابا الله يهديك... البترول هو الي قالنا خلكم معقدين ولا تتقدمو مثل بقية خلق الله... إسمح لي يابابا...انا ما أتفق معاك... أنا أشوف البلا من المطاوعه الي يفسرون الدين علي كيفهم هذا حلال وهذا حرام ...عقدونا وعقدو حياتنا...قلت يابنتي لو ماعندنا بترول...كان هالحين بالكثير عندنا أربعين أو خمسين مطوع في كل المملكه ...هالحين عندنا ملايين المطاوعه ياكلون ويشربون وبعضهم يجخون....وكل الي يسونه أنهم يقولون هذا حلال وهذا حرام وبس ..لايزرعون.. ولايرعون ولا يبنون.. ولا يصيدون سمك.. ما غير يتسدحون....وهذا حلال وهذا حرام والعالم ما غير تراكض وراهم بالأسئله....يابنتي لا تضيقين صدري...وش أقول ووش أخلي....أقبلت مي تسبق أخوانها ومن بعيد قالت يابابا ما تصدق..ما تصدق..قلت خير...قالت تتذكر الشنطه الي في باريس جاليري ألي عيت تشتريها لي وقلت سعرها ...هبال...لقيت أختها هنا وعليها خمسين في الميه تخفيظ....وانطلقت بإتجاه رأسي تمطره بالقبلات... وهي تقول الله يخليك لنا يابابا ..قلت وين أقرب مكينة صرف قالت تعال أوريك أيها يا أحلي بابا في الدنيا.................................. .......... ..يتبع
__________________ XX +3: 07:48 AM. 05-10-2008 |
|
#25
06-24-2008, 05:27 AM
| |||
| |||
| مذكرات زوج سعودي(39) رحلة ماليزيا رجعنا الي الفندق واستقبلتنا بعلتنا الكريمه بنظرات ألأرتياب والشك...فهي تعرف أني ما أحب أبو سليمان...ولم تسمع مني حتي ألأن اي تذمر أو شكوى وأنا ألي كنت أسب وأسخط إذا جو عندنا للأستراحه هو وعياله ....تركتها في حيرتها...وقعدت ألعب مع العيال أونو...كانت تروح وتجي علينا كل شوي...تبي شاهي...تبي قهوه....أحط فاكهه...وهي تنتظر أي تعليق أو إشاره لأبو سليمان وعياله...وأنا مطنش...أخيرا قالت...تدري أنهم جايين بكره...قلت أيه أدري الله يحيهم...لا تنسين تقوميني بكره الساعه تسعه ونص حتي أطلع لهم المطار....وقبت بين العيال ومشعل انه ما قال أونو وتركتها وشاركت في المعركه...لا يا مشعل ما قلت أونو..قال والله يابابا قلت بس أنت كنت تكلم ماما وما سمعتوني...والتفت علي أمه وهو علي وشك يصيح...شفتي ....بس خربتي علينا اللعبه....أنسحبت من الغرفه ورجعنا للعب والهواش....دخلت لغرفة النوم وهي منسدحه تستمع شريط لمطوع ما....سكرت المسجل وقالت....شف يابو فهد أنا والله ما ودي يجون لكن وش أسوي ما أقدر أقول لهم لا تجون....وترا كلها ثمانيه أيام....ومايبقي إلا الجميل....قلت يا شيخه حرام عليكي...الله يحييهم....وإن شاء الله نستانس وهم يستانسون....تشجعت وقالت وهي تقترب مني وتلصق جسمها بجسمي....أبو فهد...قلت ياعيون أبو فهد...قالت....أصبر أصك ألباب....قامت بالروتين المعتاد...ووضعت شريط الطريق إلي الجنه علي غير المعتاد...لأن هذا الشريط...مخصص للاليالي الرومانسيه...إلي مايكون فيه أحد في البيت...بخت كميه وافره من العطر...وانسدحت ملاصقه لجسمي وهي تلعب في شعري....وعندما شعرت أن الوضع أصبح تحت سيطرتها وإن المخلوق المنسدح بجوارها تحول بقدرة القادر سبحانه...من بني أدم بكامل قواه العقليه...ألي حيوان مطيع تتحكم فيه كما ولو أن في يدها ريموت كنترول تسيطر فيه علي كل ذره من عقله وقلبه وجسده...أنها أللحظه التاريخيه التى سقطت فيها عروش ودفعت فيها ملايين من المال والذهب وألأحجار الكريمه..أنها اللحظه التي طارت فيها رقاب وارتفعت فيها رؤوس من القاع الي القمه...هذه اللحظه التي تتحول فيها الحرمه ألي الشيطان الرجيم شخصيا...لتنحر الأنسان المسكين الضعيف الي أسمه الرجل قالت أم فهد....بصوت ناعم مثير..أبو فهد...قلت يا روح أبو فهد ..ياعيون أبو فهد...سمي ..نعم ..أمري ..تدللي...قالت بصوت يزداد إثاره....عندي طلب صغير....قلت ..طلب؟..حرام عليكي قولي أمر أبيك تنفذه....عيوني الثنتين...أمري...قالت وهي تداعب عقلي بيدها (ملا حظه..ينتقل عقل الرجل في هذه اللحظات من رأسه ألي مابين رجلينه)..أبيك تقنع البنات يتغطون الي جاء أبوسليمان قلت والله لو أشوف وحده منهم مطلعه أصبعها لا أكسره لها..مابقي إلا هي...إلا يتغطون وياكلون تبن...قالت يا الله يا أنا أحبك يا أبو فهد..................................... .يتبع
__________________ XX +3: 07:48 AM. 05-10-2008 |
|
#26
06-24-2008, 05:29 AM
| |||
| |||
| اقتباس:
__________________ XX +3: 07:48 AM. 05-10-2008 |
|
#27
07-05-2008, 01:39 AM
| |||
| |||
| مذكرات زوج سعودي(40) رحلة ماليزيا بذلت حرمنا المصون جهدا سخيا لأسعادي...طبعا أنا عارف إنها رشوه....عشان أتحمل البلاوي إلي جايه ..دخلت هي الحمام وطرت انا للبنات...قلت لمي وجود... بعد ان تولى فهد تصريف ليلي من الغرفه....أسمعو أنا وعدت ماما أجبركم تتغطون إذا جاء أبو سليمان...وأبيكم تسوون نفسكم زعلانين...وقولو لها أننا ما نبي نطلع من ألشقه وإذا قدرتي يا جود تبكين يكون أحسن...فاهمين قالو فاهمين يابابا....رجعت لغرفة النوم....وانسدحت علي السرير....خرجت حرمنا من الحمام.... أطلقت أنا تنهيده كبيره للفت ألأنتباه بعدما ركبت علي وجهي شكل الزعلان والمعصب..التفتت علي وقالت خير وش فيك ..قلت البنات الله يكره البنات..قلت لهم علي الغطى..قامت كل و حده تتفلسف من جهه...عصبت و هاوشتهم...قالت ما عليك منهم أهم شى أنت لاتنكد علي نفسك وراحت لهم... وبعد لحظات..تعالت أصوات البنات وأمهم....أشعلت سيجاره...وجلست في إنتظار النتيجه بهدوء وثقه....دخلت بعلتنا وهي في قمة التعصيب..قالت..البنات يقولون أنهم ماراح يطلعون من ألشقه أبد إذا أجبرناهم يتغطون...قلت بكيفهم ينثبرون بالشقه...أنا قلت يتغطون يعني لازم يتغطون...ما عندي إستعداد أتراجع عن كلامي...قالت..أسمع..بكيفهم خلهم يتسفعون...ألله يكرهم ...أبو سليمان عاقل..ومهوب لاصق فينا...قلت أنا ماعلي من أبو سليمان...أنا علي من الناس الي إذا درو إن بناتي دايرات في ماليزيا كاشفات... والعياذ بالله ..وش يقولون علينا ..طارت عيونها ..وحسيت إني بالغت...قلت ..علي كل حال...إذا ودك..قولي لهم إنك بتحاولين تقنعيني أنهم يتسفعون...وقولي لهم يجيون يحبون راسي عشان أرضى .....راحت وجابت البنات...حبو راسي...قلت لهم شوفو ترا أنا أبي أسمح لكم تتسفعون عشان خاطر ماما...ويا ويل أشوف وحده باين شعرها...قالو.. بس..قلت مافيه بس ما بس ...عند أبو سليمان تتسفعون يعني تتسفعون..وإذا مهوب حولكم لا تتغطون ..وختمت بلهجه حاسمه ..مفهوم ..قالو في خضوع كاذب....حاضر يابابا .................................يتبع
__________________ XX +3: 07:48 AM. 05-10-2008 |
|
#28
07-06-2008, 11:45 AM
| |||
| |||
| مذكرات زوج سعودي(41) رحلة ماليزيا في اليوم التالي قامت حرمنا بإعداد فطور معتبر..وكانت تحوفني...وهي في شك عظيم من كل تصرفاتي.... ودعتها وتوجهت للمطار....وفي حدود الساعه 11 بتوقيت ماليزيا..بدأت طلائع أخواننا السعوديين في الوصول...شناط كثيره وبزارين...وأكياس من محلات مختلفه في السعوديه...ونفس النظرات البلهاء..لبعضنا البعض...وأخيرا أطل أبو سليمان بقامته الطويله..وخلفه بعلته والأبالسه الثلاثه...وعندما نظرت اليه أدركت مزايا جديده للثوب فالرجل أشد عصقلة مما تخيلت ولكن الثوب كان يقوم بدور بارز في تغطية هذا الهيكل العظمي المسمي أبو سليمان...أندفعت أليهم هاشا باشا...ياهلا...ياهلا...ببو سليمان وعياله في ماليزيا الحمدلله علي السلامه...تو مانورت كوالالمبور قابلني ابوسليمان ونزل راسه من الدور العاشر الي الدور ألأرضي حيث يقع رأسي العزيز وبدأ عمليه التقبيل وفاحت من وجهه رائحة دهن عود من أرخص ألأنواع وهي دايم تسبب لي حومان في الكبد وصداع..هلا والله يا حي الله أبو فهد...كولالمبور منوره بوجودكم الله يسلمك...وشلونكم وشلون أم فهد والعيال والبنات..عساكم بخير..ثم تبعه سليمان والمزيد من دهن العود...ثم بدر...وأخيرا عبودي (يخرب بيته ثمانيه او تسعه سنين وطولي) يا هلا يا هلا بعبودي يا حليلك يا عبودي..وش ها الشياكه وش ها الزين... طبعا عبودي مروشينه بدهن الزفت..وبعد ذلك أخذت وضع السلام علي أم سليمان...وهو وضع غريب فهي تقف علي يميني ويدور الحوار وأنا أطالع بالأتجاه ألأخر يعني هي غرب وانا اتكلم بإتجاه الجنوب..الحمدلله علي سلامتكم..أشلونكم عساكم طيبين (أنا أكلمها بصيغة الجمع الظاهر لأنه خلوه إذا كلمتها بالمفرد) أنهينا ألسلام وملحقاته من ألأسئله المكرره عن ألأهل والعيال..وبدأنا الخروج من المطار...التفت علي ابو سليمان وكان يدف عربيه عليها مجموعه من الشناط والكراتين..وكانت أول مره أشوف منظر خلفي لأبو سليمان..وهو لابس بنطلون ...وصعقت..أبو سليمان ماله ذنب..مافيه شي أطلاقا..سهل ساحلي..مافيه أي جبال أو تلال أو هضاب..ولا حتي طعس صغير..ظهر مركب عليه رجلين..طيب الفتحه وين؟.. معقول تكون مركبه مباشرتا في ظهره..طيب كيف يروح الحمام وكيف يقعد علي الكرسي إلي جاء يعملها..ممكن يعملها وهو منسدح..قطع أبو سليمان تساؤلاتي الرهيبه.بسؤال عن جو ماليزيا ولكني جاوبته بدون ان أرفع عيني عن مؤخرته أو علي ألأصح المكان الي مفترض تكون فيه مؤخرته لأن الرجل بدون مؤخره..قلت الجو هنا سبحان الله ثلاثين بالليل والنهار..ماتنزل ولاتطلع..قال لا اله إلا الله...خرجنا من المطار وركبنا العفش في الفان وأنا أسترق النظرات لموقع المؤخره الخالي.. يمكن يكون هذا السبب إنه ما يلعب بلوت..لو بيلعب علي أيش يقعد ..إلي يلعبون بلوت يقعدون علي مؤخراتهم ..هو وش يسوي ؟؟ركبت بجوار السواق وركب هو وحرمه في الوسط ولأبالسه ورا وانطلق الفان الي كولالمبور.. ...................................يتبع
__________________ XX +3: 07:48 AM. 05-10-2008 |
|
#29
07-07-2008, 05:32 PM
| |||
| |||
| مذكرات زوج سعودي(42) رحلة ماليزيا أنطلق الفان بإتجاه كولالمبور وسط أمطار ورعد..التفتت أم سليمان إلي عيالها وقالت ..وش نقول إذا سمعنا الرعد ...لجو عيالها..سبحان من سبح الرعد بحمده...ألخ..ثم قالت إدعو ياعيال ترا الدعاء مستجاب وقت المطر.....مد أبو سليمان رقبته من المقعده الخلفيه ووضع رأسه المروح بيني وبين السواق وقال...هالحين كم لكم في ماليزيا يا أبو فهد ..قلت أسبوع.. ثمان أيام ..قال فض فوه كم تتوقع وصل سعر صندوق الطماط...طبعا بالنسبه لي هذا سؤال إستفزازي ونوع من إستعراض العضلات قدام ام عياله... قلت والله ما ادري ..قال وكأنه يطلق نظريه جديده في علم الذره...الطاق مطبوق...ثم أضاف تصدق إن علبة حليب النيدو الكبيره كانت بكذا وهالحين بكذا...وواصل بكل غرور في إستعراض أسعار الكوسه والخيار والبذنجان والجرجير ...وكان عشان يقهرني زياده يعطي سعر حلقة الخضار وسعر السوبر ماركت...أعطيته فرصه للأستعراض شوي..ثم سألت ..ما تدري كم سعر الكيميائيه هالحين..تراجع برأسه الفارغ للخلف وقال ..انت الي هالحين بالأسهم ما طلعت...قلت لا طبعا وين أطلع..انا ما أطلع إلا ربحان...وألأسهم هذي يبيلها واحد صبور يعرف كيف يلعب عليهم...ما يخليهم يلعبون عليه وترا فيها أرباح عظيمه...(طبعا ما صرحت اني أكل ستين تبن)..قالت أم سليمان...والله إني قايله له شاور أبو فهد...قبل لا تحط قروشك هنا ولا هنا ..لكن الله يهديه حطها بمساهمة ارض البندقيه...وهالحين شوفت عينك لا قروش ولا أرض..تقلص عبدالرحمن ماشاءالله...وقال بصوت ضعيف...يا بنت الحلال ارزاق.. والي مهوب كاتبه ربي مايصير..أرتفع صوت أم سليمان وقالت أيه بس الله ما قال ارمو انفسكم للتهلكه...صح ولا لا يابوفهد..قلت بكل أدب..صح..وأضافت وقال إتخذو الأسباب ..(خريجةدراسات اسلاميه)...وكنت أجلس بهدوء وسكينه مستمتعا بالهوشه الي علي وشك تقب ...عندما أنطلقت قذيفة كيماوي من المقاعد الخلفيه...وختلطت الرائحه الجديده مع رائحة دهن الزفت..مما جعل معدتي تحتج بقوه وتتطالب بالرد علي مصادر النيران خاصة وإن الفطور بيض ولبن وحلاوه طحينيه...صرخت ام سليمان ..عبودي وش أنا قايله...صاح عبودي والله مهو انا بدر....وقبت هوشه في المقاعد الخلفيه...فتح السواق الطيق للسماح للروائح بالخروج..وستغليت انا الهرج والمرج وأرسلت مع البيعه بعض من إنتاجنا ...........................يتبع
__________________ XX +3: 07:48 AM. 05-10-2008 |
|
#30
07-08-2008, 03:16 AM
| |||
| |||
|
__________________ XX +3: 07:48 AM. 05-10-2008 |
 |
| الإشارات المرجعية |
| الوسوم |
| ماليزيا, مذكرات, مذكرات زوج, مذكرات زوج سعودي |
| أدوات الموضوع | |
| طريقة العرض | |
النمط المتتابع
| |
